ŚRİ GURU GİTĀ

 

Om asya śrīgurugītā stotra mantrasya

    bhagavān sadāsiva ṛṣiḥ.

 

Nānāvidhāni chandāṁsi

   śrīguruparamātmā devatā.

 

Haṁ bījaṁ saḥ śaktiḥ kroṁ kīlakaṁ

   śrīguru-prasāda-siddhyarthe jape viniyogaḥ.

 

Atha dhyānam.

Haṁsābhyāṁ parivṛtta-patra-kamalair

    divyair jagat-kāranair,

Viśvotkīrṇamanekadehanilayaiḥ

    svacchandam ātmecchayā.

 

Taddyotaṁ padaśāmbhavaṁ tu caraṇaṁ

    dīpāṅkura-grāhiṇaṁ,

Pratyakṣāksara-vigrahaṁ gurupadaṁ

    dhyāyed vibhuṁ śāśvatam.

 

Mama catur-vidha-puruṣārtha-siddhyarthe

   jape viniyogaḥ.

 

Sūta uvāca:

1.     Kailāsa-śikhare ramye

   bhakti sandhāna nāyakam,

Praṇamya pārvatī bhaktyā

   śaṅkaraṁ paryapṛcchata.

 

 Śrī devyuvāca:

2.     Om namo deveśa

parātpara jagadguro, 

Sadāśiva mahādeva

gurudīkṣāṁ pradehi me.

 

3.     Kena mārgeṇa bho svāmin

   dehī brahmamayo bhavet,

Tvaṁ-kṛpāṁ kuru me svāmin

   namāmi caraṇau tava.

 

Iśvara uvāca:

4.     Mamarūpāsi devi tvaṁ,

   tvat prītyarthaṁ vadāmyaham,

Lokopakārakaḥ praśno

   na kenāpi kṛtaḥ purā.

 

5.     Durlabhaṁ triṣu lokeṣu

   tacchṛṇuṣva vadāmyaham,

Guruṁ vinā braḣma nānyat 

   satyaṁ satyaṁ varānane.

 

6.     Veda-śāstra-purāṇāni

   itihāsādikāni ca,

Mantra-yantrādi-vidyāśca

   smṛtir-uccāṭanādikam.

 

7.     Śaiva-śāktāgamādīni

   anyāni vividhāni ca,

Apabhraṁśa karāṇīha

   jīvānāṁ bhrāntcetasām.

 

8.     Yajño vrataṁ tapo dānaṁ

   japastīrthaṁ tathaiva ca,

Gurutattvam avijñāya

   mūḍhāste carate janāḥ.

 

9.     Gurur buddhyātmano nānyat

   satyaṁ satyaṁ na saṁśayaḥ,

Tallābhārthaṁ prayatnastu

   kartavyo hi manīṣibhiḥ.

 

10.   Gūḍha-vidyā jaganmāyā

   dehe cājñana-sambhavā,

Udayo yatprakaśena

   guruśabdena kathyate.

 

11.   Sarva-pāpa-viśuddhātmā 

   śrīguroḥ pādasevanāt,

Dehi brahma bhavedyasmāt

   tvatkṛpārthaṁ vadāmi te.

 

12.   Gurupādāmbujaṁ smṛtvā

   jalaṁ śirasi dhārayet,

Sarva-tīrthāvagāhasya

   samprāpnoti phalaṁ naraḥ.

 

13.   Śoṣaṇaṁ pāpa-paṅkasya

   dīpanaṁ jñāna-tejasām,

Gurupādodakaṁ samyak

   saṁsārārṇava-tārakam.

 

14.   Ajñāna-mūla-haraṇaṁ

   janma-karma-nivāraṇam,

Jñāna-vairāgya-siddhyarthaṁ 

   gurupādodakaṁ pibet.

 

15.   Guroḥ pādodakaṁ pītvā

   Guror-ucchiṣṭabhojanam,

Gurumūrteḥ sadā dhyānaṁ

   gurumantraṁ sadā japet.

 

16.   Kāśī-kṣetraṁ tannivāso

   jāhnavī caraṇodakam,

Gurur viśveśvaraḥ sākṣāt

   tārakaṁ brahma niścitam.

 

17.   Guroḥ pādodakaṁ yattu

   gayā’sau so’kṣayo vaṭaḥ,

Tīrtha-rājaḥ prayāgaśca

   gurumūrtyai namo namaḥ.

 

18.   Gurumūrtiṁ smarennityaṁ

   gurunāma sadā japet,

Gurorājñāṁ prakurvīta

   Guror-anyanna bhāvayet.

 

19.   Guruvaktra-sthitaṁ brahma

   prāpyate tatprasādataḥ,

Guror-dhyānaṁ sadā kuryāt

   kulastrī svapateryathā.

 

20.   Svāśramaṁ ca svajātiṁ ca

   svakīrti-puṣṭi-vardhanam,

Etatsarvaṁ parityajya

   guror-anyanna bhāvaye.

 

21.   Ananyāś cintayanto māṁ

   sulabhaṁ paramaṁ padam,

Tasmāt sarva-prayatnena

   Guror-ārādhanaṁ kuru.

 

22.   Trailokye sphuṭa-vaktāro

   Devādyasura-pannagāḥ,

Guruvaktra-sthitā-vidyā

   gurubhaktyā tu labhyate.

 

23.   Gukāras tvandhakāraśca

   rukāras teja ucyate,

Ajñāna-grāsakaṁ brahma

   gurureva na saṁśayaḥ.

 

24.   Gukāraḥ prathamo varṇo

   Māyādi-guṇa-bhāsakaḥ,

Rukāro dvitīyo brahma

   māyā-bhrānti-vināśanam.

 

25.   Evaṁ  gurupadaṁ śreṣṭhaṁ

   devānāmapi durlabham,

Hahā-hūhū-gaṇaiścaiva

   gandharvaiśca prapūjyate.

 

26.   Dhruvaṁ teṣāṁ ca sarveṣāṁ

   nāsti tattvaṁ guroḥ param,

Āsanaṁ śayanaṁ vastraṁ

   bhūṣaṇaṁ vāhanādikam,

 

27.   Sādhakena pradātavyaṁ

   guru-santoṣa-kārakam,

Guror-ārādhanaṁ kāryaṁ

   svajīvitvaṁ nivedayet.

 

28.   Karmaṇā manasā vācā

   nityam ārādhayed gurum,

Dīrgha-daṇḍaṁ namaskṛtya

   nirlajjo gurusannidhau.

 

29.   Śarīram indriyaṁ prāṇān

   sadgurubhyo nivedayet,

Ātmadārādikaṁ sarvaṁ

   sadgurubhyo nivedayet.

 

30.   Kṛmi-kīta-bhasma-viṣṭhā

   Durgandhi-malamūtrakam,

Śleṣma-raktaṁ tvacā-māṁsaṁ

   vañcayenna varānane.

 

31.   Saṁsāravṛkṣam ārūḍhāḥ

   patanto narakārṇave,

Yena caivoddhṛtāḥ sarve

   tasmai śrīgurave namaḥ.

 

32.   Gururbrahmā gururviṣṇur

   gururdevo maheśvaraḥ,

Gurureva parabrahma

   tasmai śrīgurave namaḥ.

 

33.   Hetave jagatāmeva 

   saṁsārārṇava setave,

Prabhave sarva vidyānāṁ

   śambhave gurave namaḥ.

 

34.   Ajñānatimirāndhasya

   jñānāñjana-śalākayā,

Cakṣur unmīlitaṁ yena

   tasmai śrīgurave namaḥ.

 

35.   Tvaṁ pitā tvaṁ ca me mātā

   tvaṁ bandhustvaṁ ca devatā,

Saṁsāra-pratibodhārthaṁ

   tasmai śrīgurave namaḥ.

 

36.   Yatsatyena jagatsatyaṁ

   yatprakāśena bhāti tat, 

Yadānandena nandanti

   tasmai śrīgurave namaḥ. 

 

37.   Yasya sthityā satyamidaṁ

   yadbhāti bhānurūpataḥ,

Priyaṁ putrādi yatprītyā

   tasmai śrīgurave namaḥ.

 

38.   Yena cetayate hīdaṁ

   cittaṁ cetayate na yam,

Jāgrat-svapna-suṣuptyādi

   tasmai śrīgurave namaḥ.

 

39.   Yasya jñānādidaṁ viśvaṁ

   na dṛśyaṁ bhinnabhedataḥ,

Sadekarūparūpāya

   tasmai śrīgurave namaḥ.

 

40.   Yasyāmataṁ tasya mataṁ

   mataṁ yasya na veda saḥ,

Ananya-bhāva-bhāvāya

   tasmai śrīgurave namaḥ.

 

41.   Yasya kāraṇarūpasya

   kārya-rūpeṇa bhāti yat,

Kārya-kāraṇa-rūpāya

   tasmai śrīgurave namaḥ.

 

42.   Nānārūpam idaṁ sarvaṁ 

   na kenāpyasti bhinnatā,

Kārya-kāraṇatā caiva

   tasmai śrīgurave namaḥ.

 

43.   Yadaṅghri-kamala-dvandvaṁ

   Dvandva-tāpa-nivārakam,

Tārakaṁ-sarvadā’ padbhyaḥ

   śrīguruṁ praṇamāyaham.

 

44.   Śive kruddhe gurustrātā

   gurau kruddhe śivo na hi,

Tasmāt sarva-prayatnena

   śrīguruṁ śaraṇaṁ vrajet.

 

45.   Vande gurupadadvandvaṁ

   vāṅmanaścittagocaram,

Śvetaraktaprabhābhinnaṁ

   śivaśaktyātmakam param.

 

46.   Gukāraṁ ca guṇātītaṁ

   rukāraṁ rūpavarjitam, 

Guṇātītasvarūpaṁ ca

   yo dadyātsa guruḥ smṛtaḥ. 

 

47.   A-trinetraḥ sarvasākṣī

   a-caturbāhur acyutaḥ,

A-caturvadano brahmā

   śrīguruḥ kathitaḥ priye.

 

48.   Ayaṁ mayāñjalirbaddho

   dayā-sāgara-vṛddhaye,

Yad-anugrahato jantuś

   citra-saṁsāra-muktibhāk.

 

49.   Śrīguroḥ paramaṁ rūpaṁ

   vivekacakṣuṣo’mṛtam,

Manda-bhāgyā na paśyanti

   andhāḥ sūryodayaṁ yathā.

 

50.   Śrīnātha-caraṇa-dvandvaṁ

   yasyāṁ diśi virājate,

Tasyai diśe namaskuryād

   bhaktyā pratidinaṁ priye. 

 

51.   Tasyai diśe satatam añjalireṣa ārye

   prakṣipyate mukharito madhupair budhaiśca,

Jāgarti yatra bhagavān gurucakravartī

   viśvodaya pralayanāṭaka nityasākṣī.

 

52.   Śrīnāthādi-gurutrayaṁ gaṇapatiṁ

   pīthatrayaṁ bhairavaṁ,

siddhaughaṁ baṭukatrayaṁ padayugaṁ

   dūtīkramaṁ maṇḍalam;

 

Vīrān-dvyaṣṭa-catuṣka-ṣaṣṭi-navakaṁ

   vīrāvalī-pañcakaṁ,

Śrīman-mālini-mantra-rājasahitaṁ

   vande guror maṇḍalam.

 

53.   Abhyastaiḥ sakalaiḥ sudīrghamanilair

   vyādhi-pradair duṣkaraiḥ,

Prāṇāyāma-śatair anekakaraṇair

   duḥkhātmakair durjayaiḥ;

 

Yasminnabhyudite vinaśyati balī

   vāyuḥ svayaṁ tatkṣaṇāt,

Prāptuṁ tat sahajaṁ svabhāvam aniśaṁ

   sevadhvamekaṁ gurum.

 

54.   Svadeśikasyaiva śarīracintanaṁ

   bhavedanantasya śivasya cintanam,

Svadeśikasyaiva ca nāmakīrtanaṁ

   bhavedanantasya śivasya kīrtanam.

 

55.   Yatpāda-reṇu-kaṇikā

    kāpi saṁsāra-vāridheḥ,

Setubandhāyate nāthaṁ

   deśikaṁ tamupāsmahe. 

 

56.   Yasmād anugrahaṁ labdhvā

   mahadajñānamutsṛjet,

Tasmai śrīdeśikendrāya

   namaścābhīṣṭasiddhaye. 

 

57.   Pādābjaṁ sarva-saṁsāra

   dāvānala-vināśakam,

Brahmarandhre sitāmbhoja-

   madhyasthaṁ candramaṇḍale.

 

58.   Akathādi-trirekhābje

   sahasradala maṇḍale,

Haṁsa-pārśva-trikoṇe ca

   smaret tanmadhyagaṁ gurum.

 

59.   Sakala bhuvana-sṛṣṭiḥ

   kalpitāśeṣapuṣṭir,

Nikhila-nigama-dṛṣṭiḥ

   sampadāṁ vyarthadṛṣṭiḥ;

Avaguṇa-parimārṣṭis

   tat-padārthaika-dṛṣṭir,

Bhava-guṇa-parameṣṭir

   mokṣa-mārgaika-dṛṣṭiḥ.

 

60.   Sakala-bhuvana-raṅga-

   sthāpanā-stambhayaṣṭiḥ;

Sakaruṇa-rasa-vṛṣṭis 

   tattva mālāsamaṣṭiḥ. 

 

Sakala-samaya-sṛṣṭiḥ

   saccidānanda-dṛṣṭir,

Nivasatu mayi nityaṁ

   śrīguror divyadṛṣṭiḥ.

 

61.   Agni-śuddha-samaṁ tāta

   jvālā-paricakādhiyā,

Mantrarājamimaṁ manye

   ´harniśaṁ pātu mṛtyutaḥ.

 

62.   Tadejati tannaijati

   taddūre tatsamīpake,

Tadantarasya sarvasya

   tadu sarvasya bāhyataḥ.

 

63.   Ajo’hamajaro’haṁ ca

   anādinidhanaḥ svayam,

Avikāraś cidānanda

   aṇīyān mahato mahān. 

 

64.   Apūrvāṇāṁ paraṁ nityaṁ

   svayaṁjoyotir nirāmayam,

Virajaṁ paramākāśaṁ

   dhruvam-ānandamavyayam.

 

65.   Śrutiḥ patyakṣam aitihyam

   anumānaś catuṣṭayam,

Yasya cātmatapo veda

   deśikaṁ ca sadā smaret.

 

66.   Mananaṁ yadbhavaṁ kāryaṁ

   tadvadāmi mahāmate,

Sādhutvaṁ ca mayā dṛṣṭvā

   tvayi tiṣṭhati sāmpratam. 

 

67.   Akhaṇḍa-maṇḍalākāraṁ

   vyāptaṁ yena carācaraṁ,

Tatpadaṁ darśitaṁ yena

   tasmai śrīgurave namaḥ.

 

68.   Sarva-śruti-śiroratna-

   virājita padāṁbujaḥ,

Vedāntāmbuja-sūryo yas

   tasmai śrīgurave namaḥ.

 

69.   Yasya smaraṇa mātreṇa

   jñānam utpadyate svayam,

Ya eva sarva samprāptis

   tasmai śrīgurave namaḥ.

 

70.   Caitanyaṁ śaśvataṁ śāntaṁ

   vyomātītaṁ nirañjanam,

Nāda-bindu-kalātītaṁ

   tasmai śrīgurave namaḥ.

 

71.   Sthāvaraṁ jaṅgamaṁ caiva

   tathā caiva carācaram,

Vyāptaṁ yena jagat sarvaṁ

   tasmai śrīgurave namaḥ.

 

72.   Jñāna-śakti-samārūḍhas

   tattvamālā-vibhūṣitaḥ,

Bhukti-mukti-pradātā yas

   tasmai śrīgurave namaḥ.

 

73.   Aneka-janma-samprāpta- 

   sarva-karma-vidāhine,

Svātmajñāna-prabhāveṇa

   tasmai śrīgurave namaḥ.

 

74.   Na gururadhikaṁ tattvaṁ

   na guroradhikaṁ tapaḥ,

Tattvaṁ jñānātparaṁ nāsti

   tasmai śrīgurave namaḥ.

 

75.   Mannāthaḥ śrījagannātho

   madgurus trijagadguruḥ,

 Mamātmā sarva-bhūtātmā

   tasmai śrīgurave namaḥ.

 

76.   Dhyāna-mūlaṁ guror mūrtiḥ,

   pūjā-mūlaṁ guroḥ padam,

Mantra-mūlaṁ guror vākyaṁ

   mokṣa mūlaṁ guroḥ kṛpā.

 

77.   Gururādir anādiśca

   guruḥ parama-daivatam,

Guroḥ parataraṁ nāsti

   tasmai śrīgurave namah.

 

78.   Sapta-sāgara-paryanta-

   tīrtha-snānādikaṁ phalam,

Guror-aṅghri-payobindu-

   sahasrāṁśe na durlabham.

 

79.   Harau ruṣṭe gurustrātā

   gurau ruṣṭe na kaścana,

Tasmāt sarva-prayatnena

   śrīguruṁ śaraṇaṁ vrajet.

 

80.   Gurureva jagatsarvaṁ

   brahma-viṣṇu-śivātmakam,

Guroḥ parataraṁ nāsti

   Tasmāt sampūjayed gurum.

 

81.   Jñānaṁ vijñāna-sahitaṁ

   labhyate gurubhaktitaḥ,

Guroḥ parataraṁ nāsti

   dhyeyo’sau gurumārgibhiḥ.

 

82. Yasmāt parataraṁ nāsti

   neti netīti vai śrutiḥ,

Manasā vacasā caiva

   nityam ārādhayed gurum.

 

83. Guroḥ kṛpā-prasādena

   brahma-viṣṇu-sadāśivāḥ,

Samarthāh prabhavādau ca

   kevalaṁ gurusevayā.

 

84. Deva-kinnara-gandharvāḥ

   pitaro yakṣa-cāraṇāḥ,

Munayo’pi na jānanti

   guruśuśrūṣaṇe vidhim.

 

85. Mahāhaṅkāragarveṇa 

   tapo-vidyā-balānvitāḥ,

Saṁsāra-kuharāvarte

   ghaṭa-yantre yanthā ghaṭāḥ.

 

86. Na muktā devagandharvāḥ

   pitaro yakṣakinnarāḥ,

Ṛṣayaḥ sarvasiddhāśca

  gurusevā-parāṅmukhāḥ.

 

87. Dhyānaṁ sṛṇu mahādevi

   sarvānanda-pradāyakam,

Sarva-saukhyakaraṁ nityaṁ

   bhukti-mukti-vidhāyakam.

 

88. Śrīmat-parabrahma guruṁ smarāmi

   śrīmat-parabrahma guruṁ vadāmi,

Śrīmat-parabrahma guruṁ namāmi

   śrīmat-parabrahma guruṁ bhajāmi.

 

89. Brahmānandaṁ paramasukhadaṁ

   kevalaṁ jñānamūrtiṁ,

Dvandvātītaṁ gaganasadṛśaṁ

   tattvamasyādilakṣyam;

Ekaṁ nityaṁ vimalam acalaṁ

   sarvadhī-sākṣi-bhūtaṁ,

Bhāvā-tītaṁ triguṇa-rahitaṁ

   sadguruṁ taṁ namāmi.

 

90. Nityaṁ śuddhaṁ nirābhāsaṁ

   nirākāraṁ nirañjanam,

Nityabodhaṁ cidānandaṁ

   guruṁ brahma namāmyaham.

 

91. Hṛdambuje karṇika-madhya-saṁsthe

   siṁhāsane saṁsthita-divyamūrtim,

Dhyāyed guruṁ candra-kala-prakāśaṁ

   cit-pustakābhīṣṭavaraṁ dadhānam.

 

92. Śvetāmbaraṁ śveta-vilepa-puṣpaṁ

   muktā-vibhūṣaṁ muditaṁ dvinetram,

Vāmāṅka-pīṭha-sthita-divyaśaktiṁ

   mandasmitaṁ sāndra-kṛpā-nidhānam.

 

93. Ānandamānandakaraṁ prasannaṁ

   jñānasvarūpaṁ nijabodhayuktam,

Yogīndramīḍyaṁ bhavarogavaidyaṁ

   śrīmadguruṁ nityamahaṁ namāmi.

 

94. Yasmin sṛṣṭisthitidhvaṁsa-

   nigrahānugrahātmakam,

Kṛtyaṁ pañcavidhaṁ śaśvad

   bhāsate taṁ namāmyaham.

 

95. Prātaḥ śirasi śuklābje

   dvinetraṁ dvibhujaṁ gurum, 

Varābhayayutaṁ śāntaṁ

   smaret taṁ nāmapūrvakam.

 

96. Na guroradhikaṁ na guroradhikaṁ

   na guroradhikaṁ na guroradhikam,

Śivaśāsanataḥ śivaśāsanataḥ

   śivaśāsanataḥ śivaśāsanataḥ.

 

97. Idameva śivaṁ tvidameva śivaṁ

   tvidameva śivaṁ tvidameva śivaṁ,

Mama śāsanato mama śāsanato

   mama śāsanato mama śāsanataḥ.

 

98. Evaṁvidhaṁ guruṁ dhyātvā

   jñānam utpadyate svayam,

Tatsadguru-prasādena

   mukto’hamiti bhāvayet.

 

99. Gurudarśitamārgeṇa

   manaḥśuddhiṁ tu kārayet,

Anityaṁ khaṇḍayet sarvaṁ 

   yatkiñcid-ātmagocaram.

 

100.   Jñeyaṁ sarvasvarūpaṁ ca

   jñānaṁ ca mana ucyate,

Jñānaṁ jñeyasamaṁ kuryān

   nānyaḥ panthā dvityakaḥ.

 

101.   Evaṁ śrutvā mahādevi

gurunindāṁ karoti yah,

Sa yāti narakāṁ ghoraṁ

yāvac-candradivākarau.

 

102.   Yāvat kalpāntako dehas

tāvadeva guruṁ smaret,

Gurulopo na kartavyaḥ

svacchando yadi vā bhavet.

 

103.   Huṅkāreṇa na vaktavyaṁ

   prājñaiḥ sisyaiḥ kathañcana,

Guroragre na vaktavyam

   asatyaṁ ca kadācana.

 

104.   Guruṁ tvaṁkrtya huṁkṛtya

   guruṁ nirjitya vādataḥ,

Araṇye nirjale deśe

   sa bhaved brahmarākṣasaḥ.

 

105.   Munibhiḥ pannagairvāpi

  surairvā śāpito yadi,

Kālamṛtyubhayādvāpi

  gurū rakṣati pārvati.

 

106.   Aśaktā hi surādyāśca

   aśaktā munayas tathā,

Guruśāpena te śighraṁ

   kṣayaṁ yānti na samśayaḥ.

 

107.   Mantrarājam idaṁ devi

   gururityakṣaradvayam,

Smṛtivedārthavākyena

   guruḥ sākṣāt paraṁ padam.

 

108.   Śrutismṛtī avijñāya

  kevalaṁ gurusevakāḥ,

Te vai sannyāsinaḥ proktā

  itare veṣadhāriṇaḥ.

 

109.   Nityaṁ brahma nirākāraṁ

  nirguṇaṁ bodhayet param,

Sarvaṁ brahma nirābhāsaṁ

  dīpo dīpāntaraṁ yathā.

 

110.   Guroḥ kṛpāprasādena

   ātmārāmaṁ nirīkṣayet,

Anena gurumārgeṇa

   svātmajñānaṁ pravartate.

 

111.     Ābrahmastambaparyantaṁ

   paramātmasvarūpakam,

Sthāvaraṁ jaṅgamaṁ caiva

   praṇamāmi jaganmayam.

 

112.   Vande’haṁ saccidānandaṁ

   bhedātītaṁ sadā gurum,

Nityaṁ purṇaṁ nirākāraṁ

   nirguṇaṁ svātmasaṁsthitam.

 

113.   Parāt parataraṁ dhyeyaṁ

  Nityam-ānandakārakam,

Hrdayākāśa-madhyasthaṁ

  śuddha-sphaṭika-sannibham.

 

114.   Sphaṭika-pratimā-rūpaṁ

  dṛśyate darpaṇe yathā,

Tathātmani cidākāraṁ

  ānandaṁ so’hamityuta.

 

115.     Aṅguṣṭha-mātra-puruṣaṁ

  dhyāyataś cinmayaṁ hṛdi,

Tatra sphurati bhāvo yaḥ

  śṛṇu taṁ kathayāmyaham.

 

116.     Agocaraṁ tathā’gamyaṁ

  Nāma-rūpa-vivarjitam,

Niḥśabdaṁ tadvijānīyāt,

  svabhāvaṁ brahma pārvati.

 

117.   Yathā gandhaḥ svabhāvena

   Karpūra-kusumādiṣu,

Śītoṣṇadi-svabhāvena

   tathā brahma ca śāśvatam.

 

118.   Svayaṁ tathāvidho bhūtvā

   sthātavyaṁ yatrakutracit,

Kīṭabhramaravat tatra

   dhyānaṁ bhavati tādṛśam.

 

119.   Gurudhyānaṁ tathā kṛtvā

   svayaṁ brahmamayo bhavet,

Piṇḍe pade tathā rūpe

   mukto’sau nātra saṁśayaḥ.

 

Śrī pārvatyuvāca:

120.   Piṇḍaṁ kiṁ tu mahādeva

   padaṁ  kiṁ samudāhṛtam,

Rūpātītaṁ ca rūpaṁ kiṁ

   etadākhyāhi śaṅkara.

 

Śrī mahdeva uvāca:

121.   Piṇḍaṁ kuṇḍalinī-śaktiḥ

   padaṁ haṁsamudāhṛtam,

Rūpaṁ binduriti jñeyaṁ

   rūpātītaṁ nirañjanam.

 

122.   Piṇḍe muktā pade muktā

   rūpe muktā varānane,

Rūpātīte tu ye muktās

   te muktā nātra saṁśayaḥ.

 

123.   Svayaṁ sarvamayo bhūtvā,

   paraṁ tattvaṁ vilokayet,

Parāt-parataraṁ-nānyat

   sarvam etan nirālayam.

 

124.   Tasyāvalokanaṁ prāpya 

   sarva-saṅga-vivarjitaḥ,

Ekākī niḥspṛhaḥ śāntas

   tiṣṭhāset tatprasādataḥ.

 

125.   Labdhaṁ vā’tha na labdhaṁ vā

   svalpaṁ vā bahulaṁ tathā,

Niṣkāmenaiva bhoktavyaṁ

   sadā santuṣṭa-cetasā.

 

126.   Sarvajñapadam-ityāhur

   dehī-sarvamayo budhāḥ,

Sadānandaḥ sadā śānto

   ramate yatrakutracit.

 

127.   Yatraiva tiṣṭhate so’pi

   sa deśaḥ puṇya-bhājanam,

Muktasya lakṣaṇaṁ devi

   tavāgre kathitaṁ mayā.

 

128.   Upadeśas tathā devi

   gurumārgeṇa muktidaḥ,

Guru-bhaktis tathā dhyānaṁ

   sakalaṁ tava kīrtitam.

 

129.   Anena yad bhavet kāryaṁ

   tad vadāmi mahāmate,

Lokopakārakaṁ devi

   laukikaṁ tu na bhāvayet.

 

130.   Laukikāt karmaṇo yānti

   jñānahīnā bhavārṇavam,

Jñānī tu bhāvayet sarvaṁ

   karma niṣkarma yat-kṛtam.

 

131.   Idaṁ tu bhaktibhāvena

   paṭhate śṛṇute yadi,

Likhitvā tat-pradātavyaṁ

   tat-sarvaṁ saphalaṁ bhavet.

 

132.   Gurugītātmakaṁ devi

   śuddha-tattvaṁ mayoditam, 

Bhava-vyādhi-vināśārthaṁ

   svayameva japet sadā.

 

133.   Gurugītākṣaraikaṁ tu

    mantrarājam imaṁ japet,

Anye ca vividhā mantrāḥ

   kalaṁ nārhanti ṣoḍaśīm.

 

134.   Anantaphalam āpnoti

   gurugītā-japena tu,

Sarva-pāpa-praśamanaṁ

   sarva-dāridrya-nāśanam.

 

135.   Kālamṛtyubhayaharaṁ

   sarvasaṅkaṭanāśanam,

Yakṣarākṣasabhūtānāṁ

   coravyāghrabhayāpaham.

 

136.   Mahā-vyādhi-haraṁ sarvaṁ

   Vibhūti-siddhidaṁ bhavet,

Athavā mohanaṁ vaśyaṁ

   svayameva japet sadā.

 

137.   Vastrāsane ca dāridryaṁ

   pāṣāṇe rogasambhavaḥ,

Medinyāṁ duḥkamāpnoti

   kāṣṭhe bhavati niṣphalam.

 

138.   Kṛṣṇājine jñānasiddhir

   mokṣaśrīr vyāghracarmaṇi,

Kuśāsane jñānasiddhiḥ

   sarvasiddhistu kambale.

 

139.   Kuśairvā dūrvayā devi

   āsane śubhrakambale,

Upaviśya tato devi

   japed ekāgramānasaḥ.

 

140.   Dhyeyaṁ śuklaṁ ca śāntyarthaṁ

   vaśye raktāsanaṁ priye,

Abhicāre kṛṣṇavarṇaṁ

   pītavarṇaṁ dhanāgame

 

141.   Uttare śāntikāmastu

   vaśye pūrvamukho japet,

Dakṣiṇe māraṇaṁ proktaṁ

   paścime ca dhanāgamaḥ.

 

142.   Mohanaṁ sarvabhūtānāṁ

    bandhamokṣakaraṁ bhavet,

Deva rāja-priyakaraṁ

    sarva-loka-vaśaṁ bhavet.

 

143.   Sarveṣāṁ stambhanakaraṁ

    guṇānāṁ ca vivardhanam, 

Duṣkarma-nāśanaṁ caiva

    sukarma-siddhidaṁ bhavet.

 

144.   Asiddhaṁ sādhayet kāryaṁ 

   navagraha-bhayāpaham,

Duḥsvapna-nāśanaṁ caiva

   susvapna-phala-dāyakam.

 

145.   Sarvaśāntikaraṁ nityaṁ

   tathā vandhyāsuputradam,

Avaidhavyakaraṁ strīṇāṁ

   saubhāgyadāyakaṁ sadā.

 

146.   Āyurārogyamaiśvarya-

   putrapautrapravardhanam,

Akāmataḥ strī vidhavā

   japān mokṣamavāpnuyāt.

 

147.   Avaidhavyaṁ sakāmā tu

   labhate cānyajanmani,

Sarvaduḥkhabhayaṁ vighnaṁ

   nāśayecchāpahārakam.

 

148.   Sarva-bādhā-praśamanaṁ

   dharmārtha-kāma-mokṣa-dam,

Yaṁ yaṁ cintayate kāmaṁ

   taṁ taṁ prāpnoti niścitam.

 

149.   Kāmitasya kāmadhenuḥ

   kalpanā-kalpa-pādapaḥ,

Cintāmaṇiś cintitasya

   sarva-maṅgala-kārakam.

 

150.   Mokṣahetur japennityaṁ

   mokṣaśriyam avāpnuyāt,

Bhoga-kāmo japedyo vai

   tasya kāma-phala-pradam.

 

151.   Japecchāktaśca sauraśca

   gāṇapatyaśca vaiṣṇavaḥ,

Śaivaśca siddhidaṁ devi

   satyaṁ satyaṁ na saṁśayaḥ.

 

152.   Atha kāmyajape sthānaṁ

   kathayāmi varānane,

Sāgare vā sarittīre

   ´thavā hariharālaye.

 

153.   Śakti-devālaye goṣṭhe

   sarva-devālaye śubhe,

Vaṭe ca dhātrīmūle vā

   maṭhe vṛndāvane tathā.

 

154.   Pavitre nirmale sthāne 

   nityānuṣṭhānato’pi vā,

Nirvedanena maunena

   japametaṁ samācaret.

 

155.   Śmaśāne bhayabhūmau tu 

    vaṭamūlāntike tathā,

Sidhyanti dhauttare mūle

   cūtavṛkṣasya sannidhau.

 

156.   Guruputro varaṁ mūrkhas

    tasya siddhyanti nānyathā, 

Śubhakarmāṇi sarvāṇi

    dīkṣā-vrata-tapāṁsi ca.

 

157.   Saṁsāra-mala-nāśārthaṁ

   bhava-pāśa-nivṛttaye,

Gurugītāmbhasi snānaṁ

   tattvajñaḥ kurute sadā.

 

158.   Sa eva ca guruḥ sākṣāt

   sadā sadbrahmavittamaḥ,

Tasya sthānāni sarvāṇi

   pavitrāṇi na saṁśayaḥ.

 

159.   Sarva-śuddhaḥ pavitro’sau

   svabhāvādyatra tiṣṭhati,

Tatra devagaṇāḥ sarve

   kṣetre pīṭhe vasanti hi.

 

160.   Āsanasthaḥ śayāno vā

   gacchaṁstiṣṭhan-vadannapi,

Aśvārūḍho gajārūḍhaḥ

   supto vā jāgṛto’pi vā.

 

161.   Śuciṣmāṁśca sadā jñānī

   gurugītā-japena tu,

Tasya darśana-mātreṇa

   punarjanma na vidyate.

 

162.   Samudre ca yathā toyaṁ

   kṣīre kṣīraṁ ghṛte ghṛtam,

Bhinne kumbhe yathākāśas

   tathātmā paramātmani.

 

163.   Tathaiva jñānī jīvātmā

    paramātmani līyate,

Aikyena ramate jñānī

   yatra tatra divāniśam.

 

164.   Evaṁvidho mahāmuktaḥ

   sarvadā vartate budhaḥ,

Tasya sarva-prayatnena

   bhāva-bhaktiṁ karoti yaḥ.

 

165.   Sarva-sandeha-rahito

   mukto bhavati pārvati,

Bhukti-mukti-dvayaṁ tasya

   jihvāgre ca sarasvatī.

 

166.   Anena prāṇinaḥ sarve,

   gurugītā-japena tu,

Sarva-siddhiṁ prāpnuvanti,

   bhuktiṁ muktiṁ na saṁśayah.

 

167.   Satyaṁ satyaṁ punaḥ satyaṁ

   dharmyaṁ sāṅkhyaṁ mayoditam,

Gurugītāsamaṁ nāsti,

    satyaṁ satyaṁ varānane.

 

168.   Eko deva ekadharma

    eka-niṣṭhā paraṁ tapaḥ,

Guroḥ parataraṁ nānyan

    nāsti tattvaṁ guroḥ param.

169.   Mātā dhanyā pitā dhanyo

   dhanyo vaṁśah kulaṁ tathā,

Dhanyā ca vasudhā devi

   gurubraktiḥ sudurlabhā.

 

170.   Śarīram indriyaṁ prāṇāś 

   cārthaḥ svajanabāndhavāḥ,

Mātā pitā kulaṁ devi

    gurureva na saṁśayaḥ

 

171.   Ākalpa-janmanā koṭyā

   Japavrata-tapaḥ-kriyāḥ,

Tat-sarvaṁ saphalaṁ devi

   guru-santoṣa-mātrataḥ.

 

172.   Vidyā-tapo-balenaiva

   manda-bhāgyāśca ye narāḥ,

Gurusevāṁ na kurvanti

   satyaṁ satyaṁ varānane.

 

173.   Brahma-viṣṇnu-maheśāśca

   devarṣi-pitṛ-kinnarāḥ,

Siddha-cāraṇa-yakṣāśca

   anye’pi munayo janāḥ.

 

174.   Guru-bhāvaḥ paraṁ tīrtham

   anyatīrthaṁ nirarthakam,

Sarva-tīrthāśrayaṁ devi

   pādāṅguṣṭhaṁ ca vartate.

 

175.   Japena jayamāpnoti

   cānantaphalam āpnuyāt,

Hīnakarma tyajam sarvaṁ

   sthānāni cādhamāni ca.

 

176.   Japaṁ hīnāsanaṁ kurvan

   hīnakarma-phala-pradam,

Gurugitāṁ prayāṇe vā

   saṅgrāme ripusaṅkaṭe.

 

177.   Japañ jayamavāpnoti

   maraṇe muktidāyakam,

Sarva-karma ca sarvatra

   guruputrasya siddhyati.

 

178.   Idaṁ rahasyaṁ no vācyaṁ 

   tavāgre kathitaṁ mayā,

Sugopyaṁ ca prayatnena

   mama tvaṁ ca priyā tviti.

 

179.   Svāmi-mukhya-gaṇeśādi-

   viṣṇvādīnāṁ ca pārvati,

Manasāpi na vaktavyaṁ

   satyaṁ satyaṁ vadāmyaham.

 

180.   Atīva pakvacittāya

   śraddhā-bhakti-yutāya ca,

Pravaktavyamidaṁ devi

   mamātmā’si sadā priye.

 

181.   Abhakte vañcake dhūrte

   pākhaṇḍe nāstike nare,

Manasāpi na vaktavyā

   gurugītā kadācana.

 

182. Saṁsāra-sāgara-samuddharaṇaika-mantraṁ   

brahmādi-devamuni-pūjita-siddha-mantram,

Dāridrya-duḥkha-bhavaroga-vināśa-mantraṁ

vande mahābhaya-haraṁ gururāja-mantram.

 

 

Iti śrīskandapurāṇe

   uttarakhaṇḍe īśvarapārvatīsaṁvāde

   gurugītā samāptā.

  Śrī gurudeva-caraṇārpaṇamastu.

 

 

– OM –